Luk 15 | MYW | STEP | Bo ikatuyouns waseg Yeisuw tasiyas kalbaleb takaweins ta̱kis sisiyas takalbalebsa babaw, sivines kid biliganes aygan.

Luke 15

Kabebay sip

(Matiw 18:12-14)

1 Bo ikatuyouns waseg Yeisuw tasiyas kalbaleb takaweins ta̱kis sisiyas takalbalebsa babaw, sivines kid biliganes aygan.

2 Tasiyas Palisiy sisiy takatimlakeins kaleiwag ikines, ivtokes livan, ilansa, “Taw towen sivinan takalbalebs, ikamkwams siney. Bo igak!”

3 Yeisuw ikakin-wan asilivan, ikabebay mamagina: “Tab teitan ya̱koum aleim sip lakatutan, na̱tan bikanig wanawoud, bukulana, ‘Bweina bikanig’? Adok nag. Adok bukulisawes asibabaw bisesus, bukunineiv ee... mo bukuban.

5 “Kuban, adok beimwan woum, bukukow kumey waven; e, bukuwak, kunukwes adok talawom, ‘A̱leig nikanig bo aban, kumeis bitamwa̱saws babaw ya̱kids.’

7 “Kuninuways gamag kalisiy toubweins nisesus nag aveiyag asisinap kalbaleb va̱gan bilavewas, o min-liba̱lab imwa̱saws pines tasiyas; tage kukin takalbaleb anmwa̱net bilavew ansinap, min-liba̱lab singaya bimwa̱saws, peinan ilavew ansinap kalbaleb.”

Kabebay vin inaveigun

8 O peinan asilivan nilansa, “Taw towen sivinan takalbalebs,” Yeisuw sivyuwein mo ikabebay, ilana, “Tabta na̱tan vin nises, inaveigun sinawatan, kweitan bikanig, bilivan, ‘Bweina bikanig’? Adok nag. Adok bikow nawodam, inata̱neiv, bitanev nabunatum, binineiv ee... mo biban.

9 “Biban, adok mo bidawes taliven bilana, ‘Kumeis tamwa̱saws, peinan gunaveigun nikanig bo aban.’

10 “Gamag bo ma̱wan, kukin teitan gamag bilavew ansinap kalbaleb, Yowbad siney nataka̱yobs walba̱lab mo bimwa̱saws singay.”

Kabebay taman son digumasus

11 Sivtounun Yeisuw ikabebay, ilana, “Tamwey teitan nitun tawaw asteiy.

12 “Digumasus idibek taman ilana, ‘Tamag, igaw bukukwanig gunkiyay mo bakow; nagein kukwaleiwag aveiyag tuwag bikow, aveiyag yey, o yey tut towen bakow.’

“Taman itam, ikaluweg, isek digumasus inavavag.

13 “Yam akweiy ikous, digumasus mo iyamiyis inavavag, maysan ikow, ilisow naven, inoun in kadiveiyov nen; ansinap kalbaleb waseg mo igimwal youd babaw ee... mo iyakous inamoney.

14 “Ikous namoney, mo ilivet tut kalbaleb ven towen waseg, kweis nag, kan nag, ikamet moun.

15 “Anamoun, inek tamwey teitan, ilana, ‘Tabta muwotet nises, yey bawtel, mamagina mutouwat yey?’ Tamwey towen itam, ilana, ‘Bwein, bwaloud aleig nisesus waven, kumtakavates aleig.’

Inoun, iwwotet ee... bo ivag anamoun, peinan nag kal bisek kan beikam. Singay anamoun, sivinan kid bwaloud kaeis beikam; mo idumwal nanon, ilana, ‘O takabala̱wein yey! Tamag wanven natouwat kaeis babaw, yey gog nag; kakita bakanig agumoun. Adok batamanaw banoun banek tamag balana: Tamag, agusinap kalbaleb, waseg Yowbad, o waseg yak. Adok bukupiyaveig natum yey, ne? Tabta bawtel muwotet, mamagina mutouwat yey?’

20 “E, mo itamanaw inoun ee... kakita bisap waven, taman ikin, ika̱lin nuwan, isawl, in iwliboub wa̱won, ivva̱lams son.

21 “Ivva̱lams ikous, digumasus ilana, ‘Tamag, agusinap kalbaleb, waseg Yowbad o waseg yak, adok bukupiyaveig natum yey.’

22 “Tage taman nag iligen, deisa idibakes natouwats, ilana, ‘Kusawls, kweim maynamnabwein kukwawes kumeyes, natug bisikam, ring kumeyes bisen wanaman, sandol kumeyes bivaligev wakaken. E, kuyousis mana̱wen bulumakaw natun ankaytub avakaein, kuweiys, takams tamwa̱saws, peinan natug neimat, nag gog bo imov; natug bo ikanig, nag gog bo aban.’ Mapuna isagals, imwa̱saws.

25 “Tage kunutaw igaw wa̱bag nises. Ikous nawotet im waven. Kadilakusan ven ikatiluteg kup waseg ikannuwels, isilasals.

26 “Idow taman natouwat teitan, inek, ikatugan waseg, ilana, ‘Aveiyag silma̱nin imwa̱saws?’

27 “Gwad towen ilana, ‘Peinan bwadam bo iyum neim, nises bwein, taman bo iyous a̱len namnabwein iweiy.’

28 “Kunutaw towen ikavikun, ipiyev sagal towen, isinal. Taman gog inek, igilagel, sivinan kid natun beitam.

29 “Nag gog, idibek taman, ilana, ‘Tut babaw akaninow aygam, nag kweitan tut asiplev amulivan, nag. Tage nag na̱tan a̱leig kakit bukusekeig bakasagal sigwey, nag. Natum gog towen muvavag babaw bo iyagey, isekes nakubukwabs naggeinawls wasigeis, ikous, iyum im, mo kuyous bulumakaw namnabwein kuweiy. Bo igak!’

31 “Taman gog ikatimop aygan, ilana, ‘Gwa, soug yak tasesun yam babaw. Aveiyag gunavavag yey, ma̱wana muvavag yak, peinan natug yak. Awoum kwavikun. Kadiloka tamwa̱saws, peinan bwadam bo imat, nag gog bo imov, tadoki bo ikanig, nag gog bo taba̱nes bo imov.’”

Yeisuw ikabebay ma̱wan, peinan asilivan, “Mtowen sivinan tasiyas takalbalebs.”